Di dieskuater edishon di Ride, Sail, Swim, Walk for the Roses dia 21 di yanüari 2018

2-11-2017
Di dieskuater edishon di Ride, Sail, Swim,  Walk for the Roses dia 21 di yanüari 2018

WILLEMSTAD – Unabes ku ta konosí ku 21 di yanüari 2018 ta e fecha pa e di-14 edishon di Ride, Sail, Swim & Walk for the Roses, e mas ku 10.000 partisipantenan por sinkronisá nan entrenamentu riba esei. E promé paso pa un programa eksitoso nobo di aktividat pa sostené e lucha kontra kanser ta e estreno lokal di e pelíkula Wonder dia 16 di novèmber awor. Un novedat ta ku a agregá kranking na spinergy. Esei ta kore baiskel ku man di moda ku hende ku hèndikèp tambe por partisipá. Esaki i mas informashon a bini dilanti awe tardi na e anual konferensia di prensa kick-off pa Ride for the Roses 2018 den kurá di Landhuis Cerrito di spònser prinsipal ORCO Bank.
 

Pa e rekoudashon di fondo, esun mas grandi na Kòrsou, e meta final ta i ta keda pa tur su sekshonnan rekoudá mas tantu plaka posibel pa Fondo Prinsesa Wilhelmina Fonds (PWF). E direktiva RFTRC ku Robbin Martina komo presidente na timon ya pa basta tempu ta trahando duru pa hasi e edishon nobo atrobe un éksito finansiero grandi. E otro miembronan di direktiva ta Benno van Leeuwen, Jim van Luipen, Curd Evertsz, Geert Bijlstra, Raoul Hooftman, Helena Seferina, Arthur Rosaria i Stephan Veen. Nan tin sosten di un ehérsito di voluntario ku kada un ta duna su kontribushon sin spera nada bèk i nan por stèns riba e patrosinadornan ku ORCO Bank 14 aña largu kaba e spònser prinsipal.

 

E pelíkula Wonder                                               

E promé parti di e programa di aktividat ta djaweps dia 16 di novènber ora ta pasa e pelíkula nobo Wonder durante un anochi festivo den The Cinemas in Riffort. Esaki ta e storia di un mucha hòmber di 10 aña yamá August ‘Auggie’ Pullman ku danki na sosten di su mayornan, ruman muhé, dosentenan, un amigu i un amiga ta pasa un periodo difísil na un skol básiko normal. Na skol nan tabata tent’é pa su kara desformá, loke ta resultado di numeroso operashon. E lucha ku e mucha aki a hiba kontra tentamentu na skol, riba kaya, i tur otro kaminda ta demostrá un tenasidat pa por superá tur esaki. Su aseptashon ta total ora e skol ta honr’é na final di e aña eskolar pa su méritonan spesial.

E pelíkula ta basá riba e novela pa mucha ku e mesun título ku Raquel Jaramillo bou di e seudónimo R.J. Palacio a trese riba merkado na febrüari 2012. E tabata inspirá pa e teksto di e piesa ‘Wonder’ di e kantante Nathalie Merchant. Den e pelíkula e papel di e mama ta pa e aktris Julia Robert ku a gana hopi premio Grammy kaba i ku na final di e pelíkula ta yama su yu hòmber ku tantu nan a tenta un ‘milager’. E loke ta bai rekoudá ku e pelíkula aki ta bai manera semper finalmente i kompletamente pa e fondo pa kombatí kanser, PWF.

 

Djadumingu 21 di yanüari 2018

Meskos ku den e último añanan ta spera atrobe alrededor di 10.000 partisipante huntu na e diferente partinan di e evento grandioso aki riba djadumingu 21 di yanüari 2018. Kada un di e partinan aki tin un elemento di kompetensia den nan, pero partisipashon di mas tantu hende posibel ta mas importante ku e elemento kompetetivo: riba baiskel, riba boto di bela, den landamentu, den kanamentu i korementu, pero tambe den spinning.

Mainta tempran e sentenar di kanadó i koredónan ta start na Awasá pa atraves di sea brùg Emma òf e brùg haltu Juliana pasa den kayanan di Punda, Pietermaai, Marie Pompoen bai

Mambo Beach Boulevard. Famianan kompleto ta partisipá – pa un bon kousa. Djis despues e koredónan di baiskel ta sali pa e diferente distansianan, tantu riba kaya komo un ruta pa mountainbike route. Nan salida i final tambe ta na Mambo Beach Boulevard. E landadónan ta baha na awa na bahia di Jan Thiel pa landa bai e playa di Mambo Beach Boulevard.

Na e mesun playa aki e djadumingu ei tin e tan popular Spinergy: un akto deportivo hopi intensivo riba spinningbikes kaminda kompanianan ta kompetí ku otro i nan prestashon deportivo ta konopá na rekoudá mas fondo. Na esaki awor ta agregá un parti nobo: kranking. Riba dos baiskel spesial awor hende ku hèndikèp tambe por kontribuí na e evento deportivo aki pa e bon kousa. E espektativa ta ku hustamente e grupo aki lo tin di gana pa duna nan granito ku e novedat aki riba e programa.

A bolbe hinka e parti di ‘Sail’ den e programa atrobe, pero un siman previo riba djadumingu 14 di yanüari for di e klup di belero Jan Sofat. Detayenan di kada un di e partinan lo divulgá den un estadio mas despues.

 

Embahadornan di PWF

Komo sobreviviente di kanser e embahadornan di PWF Betto Betrian i Millicent Gracia tambe a hiba palabra. E esensia di nan storia ta ku kanser no mester nifiká final di mundu i ku PWF ta hasi hopi bon trabou pa yuda pashènt pasa den nan tratamentunan.

 

 

 

Na e konferensia di prensa a sinta na e mesa prinsipal di robes pa drechi e dos embahadornan di PWF Betto Betrian i Millicent Gracia, RFTRC-presidente Robbin Martina, ORCO Bank-direktor Kenny Canword i PWF-representante Frieda Geller.