T-shirt kolorido den Ride for the Roses

24-01-2020
T-shirt kolorido den Ride for the Roses

T-shirt kolorido den Ride for the Roses

KOMUNIKADO DI PRENSA

Dia 24 di yanüari 2020

 

WILLEMSTAD – Meskos ku aña pasá e aña aki tambe lo tin un palèt di diferente koló di T-shirt di Ride for the Roses. Kada koló tin un otro mensahe.


Pa uso general durante e diferente elementonan di Ride, Swim, Sail en Walk for the Roses tin e konosido T-shirt blanku, e aña aki ku e logo mas nobo.

 

Flanèl kòrá pa sobreviviente

For di algun aña tin tambe un flanèl kòrá, pa e survivors, ke men pa esnan ku a sobrebibí kanser. E grupo ei por disidí pa partisipá, òf nan por kompañá otro sobrevivientenan i un delegashon di Fondo Prinsesa Wilhelmina na Mari Pòmpun pa animá e partisipantenan di Walk i Ride for the Roses den nan último trayekto te na e final.

 

Flanèl hel pa luchadó

E flanèl hel ku a introdusí na 2018 ku spònser prinsipal Orco Bank i ko-patrosinador Compliance & Forensic Services Caribbean ta pa hende ku na e momento aki ta den nan lucha kontra kanser i ku por usa respaldo di esnan rondó di nan i otronan aya ‘fó. Ora nan laga otronan sa ku nan ta meimei den e lucha kontra kanser, den tempunan difísil di tratamentu esnan envolví por haña mas sosten i komprenshon di esnan ku ta rondoná nan. No den tur kaso e personanan aki, tambe a konsekuensia di e intensidat di e tratamentu, tin e forsa físiko i e kurashi pa desplegá un esfuerso físiko grandi asina. Den kasonan asina nan tambe por djòin e grupo di survivor i e delegashon di PWF na Mari Pòmpun. Niun hende no tin nodi hiba e lucha e so i e grupo aki por inskribí tambe na PWF i danki na Ride e flanèl ta grátis.

 

Flanèl pretu pa komemorá esnan ku no ta ku nos mas

For di aña pasá tin tambe e flanèl koló pretu, na rason di 30 florin pa kada; e ta pa famia i amigunan di esnan ku a lucha, pero ku a haña nan ta sukumbí. Ku esaki fundashon Ride for the Roses ke logra, tambe despues di a konsultá PWF, pa kibra ku e tabú ku ta eksistí ainda serka esnan ku pa motibu di e malesa ta kai den un sorto di isolashon, pasobra nan no ke pa otronan sa mes. Por optené e flanèlnan aki entre dianan 27 di yanüari i 1 di febrüari na Orco Bank.
 

Flanèl oraño pa e voluntarionan

A propos, tin hende tambe ku ta kana den nan T-shirt oraño. Nan ta destiná pa e grupo grandi di voluntario ku tur aña ta duna e fundashon un bon man den tur sorto di tarea.