A posponé aktividatnan pa Ride, Swim & Walk for the Roses

23-12-2020
A posponé aktividatnan pa Ride, Swim & Walk for the Roses

A posponé aktividatnan pa Ride, Swim & Walk for the Roses

KOMUNIKADO DI PRENSA
Dia 23 di desèmber 2020.

WILLEMSTAD – Direktiva di fundashon Ride for the Roses Curaçao (RFTRC) no ta skapa i ta hañ’é ta posponé e aktividatnan planiá pa e promé kuartal di 2021 pa un fecha mas lat. Meskos ku ta konta pa asina tantu otro evento, aki tambe ta Covid-19 ta daña kos. Awor aki ta trahando riba plannan pa un forma virtual ku muy probablemente lo tuma lugá den di-dos kuartal di 2021. Meta di RFTRC ta i ta keda tambe den su di 17 aña pa rekoudá fondo pa e lucha kontra kanser na Kòrsou.

Mirando e medidanan di Gobièrnu pa mitigá e riesgo pa plama e vírùs di Corona, direktiva di RFTRC a disidí, despues di a konsultá gerensia di Orco Banko komo patrosinadó prinsipal, pa posponé e aktividatnan deportivo di tradishon na kuminsamentu di 2021. RFTRC tampoko ke pone e partisipantenan, voluntarionan ni su mes hendenan na niun riesgo di kontagio sin tin nodi.   

Manera ta konosí e meta primordial di RFTRC ta ku e aktividatnan pa rekoudá fondo na Kòrsou pa sostené pashèntnan di kanser i miembronan di nan famia na diferente manera. I durante e temporada aki di Covid-19 tambe e pashèntnan di kanser tin gran mester di sosten. E partner di promé ora, ku ta tuma e tarea aki pa su kuenta, ta fundashon Prinses Wilhelmina Fonds (PWF). RFTRC ta indiká ku mas despues e aña ei lo tin oportunidat pa desplegá akshonnan, anke otro for di normal, ku ta generá fondo pa e mesun bon kousa importante. Por ehèmpel, den kombersashonnan ku ekspertonan ta trahando na posibilidatnan pa den e di-dos kuartal bini ku aktividatnan virtual ku ta seif pa Covid-19, ku ta yamativo pa hende di tur edat i ku ta kontrtibuí tambe na rekoudashon di fondo na 2021. Na su debido tempu direktiva di RFTRC lo divulgá mas informashon.

Ta sobra direktiva di RFTRC awor únikamente pa gradisí di kurason komunidat kompleto di Kòrsou, ku aña aden aña afó a respaldá e aktividatnan aki masalmente. I mesora ta deseá nan dushi dianan di fiesta. Anto ekspresando e speransa ku na 2021 un realidat nobo, mihó ta vislumrando pa nos tur.