WILLEMSTAD – Pokopoko por bai vislumbrá mas i mas e proyekto artístiko Art for the Roses ku ta organisando na òktober i novèmber awor huntu ku Landhuis Bloemhof i ku lo resultá den un findishi di e obranan di arte pa e bon kousa: lucha kontra kanser.
E proyekto di arte interdisiplinario ta tuma lugá di 20 di òktober pa 19 di novèmber na Landhuis Bloemhof, e Katedral di Sumpiña i Number Ten. Tur partner riba tereno di Bloemhof ta koperá. Un luna largu e aktividatnan lo ta den e ambiente di e rekoudashon aki di fondo.
Riba programa tin: e eksposishon di grupo Art for the Roses ku findishi, un sena Kick-off na Number Ten, e konsierto Roses en kolaborashon ku e katedral di Sumpiña i Number Ten, un marshe di Pasku, un anochi di sine di Hòfi Cinema, tayernan Pintamentu Intuitivo en konsulta ku Fondo Prinsesa Wilhelmina (PWF), maintanan di ‘meet the artist’, un evento Bloemhof by Night kaminda ta invitá artista di diferente disiplina pa partisipá i durante henter luna lo tin un ko’i tira na boka spesial di Roses na Number Ten.
Ku rosa inkluí
E tarea ku a duna e artistanan ku ta partisipá na e eksposishon di grupo ta ku nan tin di entregá un obra di arte kaminda a inkluí un rosa di un manera òf otro. E obranan di arte aki nan lo eksponé na Landhuis Bloemhof. Pa kada obra ku ta logra bende e artista ta haña un suma fiho, mas 10 porshento di e loke mas e generá na e findishi. A skohe pa e konstrukshon aki pa sostené e artistanan, pasobra nan tambe a sufri en grande a konsekuensia di e restrikshonnan di Covid. Mas ku klaro ku nan obranan lo haña bastante publisidat atraves di e website (renobá pa e tempu ei) di Ride for the Roses i via medionan sosial. Ademas, tur hende por opservá e obranan na Landhuis Bloemhof. Ta bai klousurá e eksposishon Art for the Roses ku un findishi bou di guia di e ‘auction masters’ Dimitri Cloose i Michèle Russel-Capriles; nan mes tambe ta aktivo den arte. E obra di arte finalmente ta bai pa e doño nobo ku a ofresé mas tantu; na mes momento asina ta hasi un kontribushon valioso na e bon kousa.
Tambe músika, arte di palabra, teater, baile
Artistanan renombrá i ménos konosí a reakshoná mesora ku entusiasmo riba un karta di Landhuis Bloemhof, kompletamente respaldá pa direktiva di di fundashon stichting Ride for the Roses, pa puntra nan pa partisipá na e eksposishon di grupo di Art for the Roses. Antisipando e findishi riba e último dia di e eksposishon, ta organisá diferente aktividat na Landhuis Bloemhof i e Katedral di Sumpiña; nan tur tambe lo ta den e ambiente di Art for the Roses. Aparte di artistanan plástiko lo invitá tambe otro disiplina pa partisipá di moda ku por hinka un programa multifasétiko di un luna den otro. Pa esei por mèldu tur ora bai atraves di expo@bloemhof.cw.
Rekoudá fondo un luna largu
Un luna largu e proyekto di arte interdisiplinario Art for the Roses lo hala atenshon pa e lucha kontra kanser na Kòrsou. Ku benta di karchi pa tur e aktividatnan i e kontribushonnan atraves di e benta di ko’i tira na boka Roses na Number Ten lo yuda generá fondo. E programa lo ta diverso pa kada ken su smak pa gosa i pa perkurá ku e pòtmòni kontribuí na e bon kousa. Al fin al kabo, ta esei ta e meta prinsipal.
Save the dates
22 òktober Apertura eksposishon di grupo Art for the Roses
22 òktober Kick-off sena Roses na Number Ten
27 òktober Hòfi Cinema ku pelíkula di i tokante Rina Penso
4 novèmber Roses Concert Cathedral by Night
5 novèmber Marshe di Pasku Bloemhof
11 novèmber Bloemhof by Night Experience
15 novèmber Presentashon di buki ‘Curaçao, my lasting love affair’ di Bea Moedt
19 novèmber Findishi Art for the Roses
