WILLEMSTAD – Miéntras ku tur kaminda ta anunsiá ku fundashon Ride for the Roses tur aña ta organisá e evento Ride, Walk & Swim for the Roses pa rekoudá fondo na benefisio di Fondo Prinsesa Wilhelmina (PWF), aki-aya ta puntra na kiko ta gasta tur e plakanan. Presidente di PWF, señora Ageeth Termars, ta afirmá ku e evento aki a krese te bira e fuente prinsipal di entrada pa nan organisashon. Entre otro pa e motibu ei pokopoko a krese un laso íntimo entre e dos organisashonnan ku pa gran parti ta drei riba voluntario.
Señora Termars sa kon esei a krese pasobra e tabat’ei for di tempran ora kasi dos dékada pasá a kuminsá ku e evento di Ride. Na inisio e kontribushonnan a bai pa gran parti ainda pa paketenan di kuminda pa pashènt di kanser; awendia e mayoria di e ingresonan di e fondonan ta destiná pa guia profeshonal pa pashènt di kanser i nan sernan kerí. Aparte di esnan na kabes di e ofisina na Skalo, PWF tin tambe sinku trahadó sosial ku nan mester paga pa nan aktividatnan valioso. No por laga pashèntnan i nan famia famia pa nan kuenta. Tin di asistí nan na dado momento ora nan haña e diagnóstiko, ora di e tratamentunan ku ta sigui i tambe durante e proseso di rekuperashon despues di e tratamentunan hopi be fastioso. Mester evitá ku pashèntnan ta sinti nan so den nan situashon.
Ròl di mediadó
Den koperashon estrecho ku un kantidat di profeshonal, PWF ta ofresé terápia dirigí. Danki na e bon kontaktonan di hopi aña ku tur sorto di instituto, PWF por entervení tambe, manera regla un pasaporte di emergensia pa tratamentu urgente den eksterior, i atraves di bon kontaktonan di hopi aña ku instansianan sosial manera Reda Sosial i FKP ora mester hasi adaptashon na kas, etc. Den kasonan asina PWF tin un ròl di mediadó. Ademas, PWF a inisiá un trayekto pa sigui profeshonalisá, entre otro pa upgrading di e sistemanan di kòmpiuter. Meskos ku e gastunan di personal, esaki ta un kondishon pa PWF por kontinuá brinda guia profeshonal garantisá di kalidat haltu na e hendenan ku mas mester di esei na momentonan asina krusial. E ta sigurá ku ta wak minusiosamente pa bòltu tur depchi ku drenta, pa ta sigur ku ta gasta esei di forma responsabel, i kaminda por, ta ekonomisá tambe. P’esei señora Termars ta asina gradesidu na e ehérsito di voluntario ku tantu PWF komo Ride for the Roses por sigui stèns ariba.
Fuente mas grandi
Kaminda den pasado e kolèkte anual na luna di sèptèmber tabata e fuente mas importante di entrada pa PWF, den kurso di añanan esei a kambia. Awendia e fuente mas grandi pa PWF ta loke Ride for the Roses ta generá na fondo. Ta danki na un maneho finansiero responsabel, tantu di PWF komo di Ride for the Roses, ambos por a surpasá e periodo di covid rasonablemente, ora ku durante dos aña e aktividatnan di Ride no por a tuma lugá. Señora Termars finalisando: “Mas ku klaro ku gradualmente a krea un laso íntimo entre fundashon Ride for the Roses na esun banda i nos di PWF na e otro banda. E laso ei nos ta tesorá ku ku henter nos kurason, bo ta komprendé tòg?!”.
