Katedral di Zumpiña ta e sitio
WILLEMSTAD – Djasabra dia 18 di mart awor e Art for the Roses findishi di arte kombiná ku un sena ta tuma lugá; originalmente e tabata planiá pa novèmber último, pero mester a aplastá esei pa motibu di molèster di hopi awa. Durante un sena di tres plato dilanti e Katedral di Zumpiña, fundashon Ride for the Roses i Landhuis Bloemhof, ku sosten di spònser prinsipal Orco Bank, ke yega asina leu ku e presentenan ta bider riba e obranan di arte ku ta ofresé. E meta final ta pa e anochi ei, bou di guia di e auction masters Michèle Russel-Capriles i Dimitri Cloose, rekoudá mas tantu plaka posibel. E fondonan ei tur ta bai na benefisio di kuido pa pashènt di kanser na nos isla.
Anteriormente por a opservá e 36 obranan di arte di artista lokal (ku un rosa den dje) un luna largu durante un eksposishon na Landhuis Bloemhof. Ketu bai por tira un bista riba e obranan den un katálogo digital riba e website di Ride for the Roses (ridefortheroses.net).
Persona i empresanan interesá ketu bai por kumpra karchi online na rason di 175 florin pa persona pa e ‘auction & dinner night Art for the Roses’ aki. Persona i kompania ku ya tabatin karchi pa e evento di novèmber último djasabra awor por drenta ku nan. E entrada ta na Landhuis Bloemhof. Por stashoná outo aya i na e lugá di stashonamentu di Orco Bank.
