WILLEMSTAD – Na kaminda pa e di-18 edishon di e evento Ride, Walk en Swim for the Roses riba dia 28 di yanüari awor, e empresa lokal Kukudushi Kòrsou a opsekiá e organisashon un kantidat di hoya trahá aki mes di kokolishi djaki pa esnan ku ta lucha pa sali for di e gara di kanser. Atraves di e artefakto trahá di e kokolishi pa sirbi komo pendetif (=hanger) pa e persona en kestion, por ehèmpel, por sigui e ruta di e turtuga ‘Hope’ ku resientemente tabata landa ainda na e kosta nort di Colombia – pa esaki sirbi komo inspirashon pa su sirkunstansia personal.
Kukudushi for di un aña i mei ta un BV lokal ku un mishon sosial, asina su inisiadó Patrick Gruijters, un marinero penshoná, a konta. Di e volúmen di benta ya tin instituto lokal ku ta boga pa medioambiente, inklusividat i nos komunidat ta probechá; entre nan Green Phenix (kolektá plèstik pa resiklahe), Willifood (organisá kuminda pa esnan ménos priviligiá) i BRANCH Coral Foundation (rekuperá refnan di koral) i awor tambe e fundashon Ride for the Roses (pa sosten na e lucha kontra kanser).
Di e kaska di kokolishi, chikitu i blanku (pap: kokolishi di kalakuna; latin: cerion uva uva), ku ta konosí na Kòrsou so, prinsipalmente mamanan soltero ku a haña e formashon p’e, na man ta traha e hanger den diferente variashon. Den kada hanger trahá spesialmente pa Ride for the Roses tin un rosa chikitu komo símbolo di Ride huntu ku un lampi, pero tambe un chip spesial. Segun un téknika diseñá lokalmente, ku su propio software i despues di a aktivá esaki di forma simpel, por optené sierto informashon riba kualke selular moderno; manera di e turtuga yamá Hope ku ta landando den Mar Karibe. Esaki ta korespondé ku e tema di speransa ku fundashon Ride for the Roses kontinuamente ke duna e ‘fighters’ kontra kanser.
E hangernan úniko aki di Kukudushi ta popular kaba serka turista, sigur durante e bishita frekuente di barkunan krusero den haf. P’esei e produkto aki ta mas konosí pafó di Kòrsou ku e ta aki mes. E hangernan úniko pa kadena aki, trahá spesialmente pa
Ride, Kukudushi ta regalá na e fundashon; nan ta benta na eventonan di e fundashon Ride, entre kua durante e último siman di yanüari den kurá di spònser prinsipal Orco Bank. E rekoudashon di benta ta bai na benefisio di fondonan di fundashon Ride for the Roses. Pa mas informashon: (info@kukudushi.com, telefon 560 0000)
