WILLEMSTAD – Night for the Roses ta un festival kultural multidisiplinario ku ta tuma lugá djabièrnè dia 13 di yanüari riba tereno di Landhuis Bloemhof. Gran parti di e rekoudashon ta bai pa fundashon Ride for the Roses, e organisashon ku pa basta aña tin e afan pa lucha kontra kanser.
Landhuis Bloemhof, e mondi i e Katedral di Sumpiña lo fungi komo dekor pa e diferente presentashonnan. Number Ten ta perkurá pa sisti stoma.
Na e festival ta partisipá:
- E poetanan Estela de Haseth, Vesuhely Americaan i Sheila Payne.
- Fina Dance Art School ku su alumnonan lo balia a base di un koregrafia ku nan a desaroyá spesialmente pa e rekoudashon aki.
- E artista Christian Peralta tin un sneak preview di su eksposishon ‘Quit my job, paint your life’.
- E koro Popcorn.
- Lo tin un kaminata teatral den mondi ku Drazans.
Músika lo tin di Chispas Latinas, Russell Soleana & Isoko, Christine i Randal Corsen & Friends, Crisèn i su banda 8.40 i di alumnonan di CCC Music Academy Edgar Palm.
Originalmente lo a tene e festival na novèmber último, pero pa motibu di áwaseru mester a posponé esei. Esnan ku ya a kumpra un karchi por drenta ku esei. Karchi ta kosta 45 florin (sin inkluí catering) pa adulto, 20 florin pa mucha (0 te 12 aña); por kumpra karchi di antemano i na porta di Landhuis Bloemhof na Santa Rosaweg nr. 6 (pegá ku Tap Maar In).
Djoin nos i kuminsá e aña ku arte, músika, baile, teater i poesia, i kontribuí na e bon kousa.