WILLEMSTAD – Tres aña despues di e último edishon eksistoso di Ride, Walk i Swim for the Roses esun nobo ya ta den porta: riba djadumingu dia 5 di febrüari. Atraves di e website www.ridefortheroses.net por inskribí online kaba pa partisipá na e Ride (kore baiskel) i e Walk (kore i kana), miéntras pa e Swim (landa pa kompetensia i pa rekreashon) registrashon online so ta konta. Inskripshon komo grupo tambe ta un opshon. Normalmente e kantidat di inskripshon ta mas haltu den e delaster siman promé ku e evento. E siman binidero inskribí i pago ta tuma lugá den kurá di patrosinador prinsipal Orco Bank na Landhuis Cerrito.
E aña aki e kantidat di inskripshon digital ta basta mas haltu ku den pasado. Esei por ta un indikashon di un sierto ‘hamber’ pa partisipá na e evento despues di un interupshon obligatorio di 2 aña, tambe pasobra e meta ta pa rekoudá fondo na benefisio di pashènt di kanser i nan famia. Loke tambe por un hunga un ròl den esaki ku den e lockdown-nan hende a bira mas ábil den trafikashon digital. Den kaso di un inskripshon online e partisipante por mustra un print-out òf un prueba riba su telefon selular. Esei lo hasi e trabou di e voluntarionan asina mas fásil ku ménos tempu di espera riba e último dianan antisipando e evento grandi ku semper ta bastante intenso.
Suma di inskripshon
Inskripshon pa un elemento ta kosta 20 florin pa persona; pa 2 òf mas elemento (kana, kore baiskel i/òf landamentu) ta kosta 30 florin. Pa mucha te i ku 11 aña ta pidi 15 florin pa un elemento i 20 florin pa mas elemento. Partisipashon na e Swim pa kompetensia ta kosta 30 florin, i 10 florin èkstra pa persona pa 2 òf mas elemento.
Dia djaluna 30 di yanüari te i ku djabièrnè 3 di febrüari próksimo, Ride su voluntarionan ta para kla atrobe pa registrashon, pagamentu i entrega di flanèl den kurá di Orco Bank for di mitar di 9 di mainta te mitar di 4 di atardi i riba djasabra 4 di febrüari di 9 or di mainta te 4 or di atardi. Kada partisipante ku inskribí i paga tin derecho riba un flanèl, ku e ta bisti dia di e evento, un refresko i un pida fruta na yegada riba playa di Mambo Beach BLVD. I pa no lubidá tambe e rosa na final!
Rutanan
Tin dos ruta pa Walk for the Roses: for di 7 or di mainta 7.8 km (pasa riba e brùg haltu Juliana) i 5 km (pasa ribsa brùg Emma) pa Mambo Beach BLVD. Pa Ride for the Roses (riba baiskel) tin mas despues e mainta ei Easy Ride di 10 km (tambe pa hubentut) i dos bike tour di 40 i di 60 km, salida i final na Mambo Beach BLVD. Pa motibu di e kondishon di e tereno den saliña di Jan Thiel mester a kanselá e ruta pa mountain bike. Swim for the Roses ta kuminsá 12 or di mèrdia na Zanzibar na bahia Jan Thiel i ta kaba na Mambo Beach BLVD.
Patrosinadornan
E aña aki e fundashon por konta atrobe ku respaldo i koperashon, aparte di su patrosinador prinsipal Orco Bank, di Remax, CPS, Glacial, Compliance & Forensic Caribbean, EWT, Grant Thornton, EY Caribbean, Intertrust, Coca Cola, Mambo Beach BLVD, Empire, Radio Service, BDO, Mammoet Printing, Massive Productions, Ducaso, Number Ten, Dynaf, Van der Valk, Extra, Antilliaans Dagblad, Profound, Amigoe, Socialutions, Paradise FM, Zanzibar, LionsDive, Bonita, Mood Beach, Wet & Wild Beach Club, Cabana Beach, Tramm, Vistra, i tur voluntario, mas otronan ku nos por a lubidá. De paso, tin sufisiente voluntario; e entusiasmo tabata grandi atrobe, pero no tin nodi mèldu mas.
