A aplasá findishi Art for the Roses pa
18 di mart 2023 na Landhuis Bloemhof
WILLEMSTAD – Pa diverso motibu i den bon konsulta ku esnan envolví, fundashon Ride for the Roses a disidí pa hala e fecha di e findishi di arte Art for the Roses, planiá pa djasabra awor, pa mart otro aña. Ya komo Ride su meta final ta pa rekoudá mas tantu fondo posibel pa kuido di pashènt di kanser na Kòrsou, i tambe ku aprobashon di spònser prinsipal Orco Bank, a skohe pa wanta un ratu ku e proyekto aki. “E tabata un desishon pisá, mas ainda pasobra asina tantu hende a dediká 100% pa esaki, pero tòg nos mester a skohe pa e paso aki”, segun presidente Robbin Martina di Ride.
Un luna largu 36 obra di arte di artistanan lokal ta kologá den Landhuis Bloemhof. Despues di djasabra awor ta kanselá e eksposishon aki, pero por sigui wak e obranan den e katalòg digital riba e website renová di Ride for the Roses (ridefortheroses.net). De paso, online por sigui bider riba e obranan di arte, tantu lokalmente komo for di eksterior.
Proseso di findishi
Ultimo luna e organisashon a enfrentá diferente kontratempu. Un kombinashon di faktor a hunga un ròl pa tuma e desishon aki. Por ehèmpel, un programa kuidadosamente hinká den otro di parti di Landhuis Bloemhof, restorant Number Ten i Katedral di Sumpiña pa antisipá e fundishi, elementonan di dje kada be dinobo a konfrontá problema ku mester a posponé un ke otro. Tambe pa motibu di e molèster di awa rondó di Landhuis Bloemhof a pensa pa e findishi tuma lugá den e lanthùis, loke no ta e solushon ideal pa un proseso eksitoso di findishi. Pa kolmo, e siman aki un di e ‘auction masters’ a bira malu i a hañ’é ta retirá, i komo riba un término asina kòrtiku no tabatin un remplasante adekuá kla mesora, a disidí na interes di e propósito di Ride i tambe di e artistanan ku ta partisipá pa tuma e desishon aki, ni maske kon ferfelu e por ta.
Tur hende i kompania ku tin karchi pa e evento di djasabra awor por konta ku nan karchinan ta keda válido pa e findishi na mart; si nan ke nan por haña nan sèn bèk tambe. Por manda mail pa info@ridefortheroses.net.
Despues di Ride i karnaval
E tempu benidero e fundashon lo tin su mannan yen na organisashon – despues di 2 aña ku e pandemia di corona a impedí esei – di e siguiente edishon di Ride, Walk i Swim for the Roses ku ta planiá pa tuma lugá djadumingu dia 5 di febrüari. Ora esaki i karnaval ta tras di lomba, lo realisá e findishi masha spesial aki den trankilidat i ku sirkunstansia mas favorabel.
Posponé no ta meskos ku kanselá
Landhuis Bloemhof ta laga sa ku e tampoko no ta tira sèrbètè den rin apesar di kontratempu. “Tin be bo mester dobla pareu ku bientu manera bambú ta hasi. I despues normalmente ta lanta bèk. Loke ta sosodé únikamente ta ku ta hala e fecha pa otro aña”, segun Manager Elodie Heloise. E katalòg online pa bider ta sigui normalmente aktivo i regularmente lo aktualisá esaki. Hende por sigui hasi nan oferta atraves di mail. Por haña e katalòg online di Art for the Roses riba website di Landhuis Bloemhof i riba esun di Ride for the Roses.
“Anto e Night for the Roses, ku mester a posponé na dos okashon, ta sigui dia 13 di yanüari. E partisipante i músikonan ta keda mes enkantá. Ke men, nos ta sigui normalmente.”
Hende ku a kumpra karchi kaba pa e konsierto ku a kanselá i pa e Night for the Roses tin tres opshon: nan por warda nan karchi i usa esaki pa dia 13 di yanüari awor, nan por haña nan plaka bèk na Landhuis Bloemhof òf nan por skohe pa laga esaki komo donashon pa Ride for the Roses.
Mas informashon atraves di www.bloemhof.cw, info@bloemhof.cw.
