WILLEMSTAD – E siman aki a habri e registrashon online pa partisipashon na e diferente elementonan di e anual evento Ride, Walk, Swim & Surf for the Roses riba djadumingu dia 28 di yanüari próksimo. Pa esei ta nesesario pa atraves di www.ridefortheroses.net/registration yena i manda e datonan – pa indivíduo, pero tambe pa grupo – pa despues risibí un konfirmashon via mail.
E aña aki tambe e fundashon Ride for the Roses ta organisá e evento grandioso aki pa generá mas tantu fondo posibel pa e lucha kontra kanser i un akohida i guia apropiá pa pashènt i nan hendenan mas yegá. P’esei fondo Prinsess Wilhelmina (PWF) ta e benefisiario primario di e aktividatnan aki. Kada partisipante na e evento aki ta kontribuí su granito na e bon kousa aki.
Rutanan Djadumingu 28 di yanüari e kanadó i koredónan ta sali 7 or di mainta for di Awasá den dos grupo: esnan di 5km pasando brùg (di ponton) Reina Emma i esnan di 7.8 km ta pasa riba brùg Reina Juliana, tur dos ku final na Mambo Beach/BLVD. Pa 8 or e diferente gruponan di koredó di baiskel – 40 i 60 km i easy ride – ta sali for di Mambo/BLVD kaminda nan ta finalisá tambe. Pa mediodia e landadónan ta kuminsá na Zanzibar/Jan Thiel, esnan kompetidor promé i despues esnan di rekreo, ku finish na Wet & Wild Beach. Mas òf ménos mesun ora e ‘kite, windsurfers i wingfoilers’ ta bandoná Klein Kòrsou direkshon pa Wet & Wild Beach. Algu promé, mitar di 12, ta tuma lugá e Kids Swim for di Lions Dive pa Wet & Wild. Mas ku bastante akshon e dia ei anto!
Kontribushonnan Esnan ku ke partisipá na un di e aktividatnan mester paga 25 florin; partisipashon na dos òf mas elemento ta rekerí pago di 35 florin. Pa mucha ta 12 aña partisipashon na un elemento ta kosta 20 florin i pa dos òf mas e ta bira 25 florin. E kontribushon di e landadónan kompetetivo ta 35 florin; si nan ke partisipá na un elemento mas, esei ta bira 45 florin. Despues ku a paga, tur partisipante inskribí tin derecho riba un flanèl di Ride (S, M, L, XL, XXL en XXL) i ta haña na yegada algu di bebe, un pida fruta i un rosa
komo rekuerdo. Pa e hóbennan tin t-shirt na tres tamaño (Youth Small, Medium en Large).
Buska T-shirt Den e siman di 22 te i ku 27 di yanüari e partisipante ku mustra un kopia òf screenshot riba nan telefon (i un prueba di pago) por buska nan T-shirt den kurá di Orco Bank na Landhuis Cerrito na Schottegatweg Oost; aya por paga tambe. Di 22 te i ku 26 di yanüari e kolaboradornan di Ride ta para kla pa yuda for di mitar di 9 mainta te mitar di kuater di atardi. E último posibilidat ta djasabra 27 di yanüari di 9 or mainta pa 4 or di atardi. Ademas, na e sitio ei por registrá tambe yenando e formulario na man, miéntras esnan interesá por kumpra tambe artíkulonan di promoshon di Ride, manera tèrmo, car sunshades, diferente tipo di tas i air freshener pa den outo.
Gruponan partisipante Registrashon di grupo (di empresa, famia, amigu, etc.) di 10 òf mas persona tambe ta posibel, pero pa esei mester yena si e datonan korekto di nan tur. E inskripshon di grupo ta posibel te djarason dia 24 di yanüari.
Pa partisipashon na Swim for the Roses registrashon online ta e úniko opshon; esei no por sosodé na man den e último siman na Orco Bank.
