WILLEMSTAD – Despues di un interupshon di dos aña a konsekuensia di covid-19, for di djadumingu último fundashon Ride for the Roses Curaçao (RFTRC) por wak bèk ku satisfakshon riba reanudashon di Ride, Swim & Walk for the Roses. E tabata inkluí pa promé biaha e entrada di e partisipantenman na Surf for the Roses. Un ke otro ta impliká ku komunidat di Kòrsou ketu bai ta respaldá e sosten i guia na pashènt di kanser, den bon man serka fondo Prinsesa Wilhelmina (PWF). Entre e kasi 6000 partisipantenan tabatin tambe esnan di pafó di Kòrsou ku a bini aki pa duna nan granito.
Señal di salida
Djis despues di 7 or di mainta, Désirée Alberto-Martina na Awasá a duna e señal di salida pa e Walk for the Roses, un ruta di 7.8 kilometer ku a pasa riba e brùg haltu Juliana pa atraves di Waaigat, Pèn i Mari Pompun kaba na Mambo Beach/BLVD. Tabatin tambe un ruta alternativo di 5 km pa kana for di Awasá riba brùg Emma pa Mambo Beach/BLVD. Na yegada e partisipantenan a risibí un bunita rosa; esei tabata warda e partisipantenan na e otro partinan deportivo tambe.’ Manera kustumber Maarten Schakel tabata esnan na final.
E tres elementonan di korementu di baiskel a kana zetá. Miéntras ku e kanadónan tabata drentando, e gruponan di koredó di baiskel a sali pa e ruta di 40 i 60 km. Djis despues a sigui e kareda Easy Ride di 10 km, pa Punda i bèk. Salida i final tabata na Mambo Beach/BLVD.
Landamentu
Poko despues di 12 or di mèrdia e landadónan kompetidor a sali for di Zanzibar/Jan Thiel, siguí pa e landadónan di rekreashon. Aki Director di CPS Fernando da Costa Gomes a duna e señal di salida. E promé landadónan di kompetensia a drenta despues di algu mas ku mei ora na Mambo Beach/BLVD.
Ora e último landadónan tabata aden den kareda di 2 or, e promé sùrfdónan (windsurf, kite surf, foil surf) a drenta for di Klein Kòrsou aya na Mambo Beach. Organisashon di Surf for the Roses no tabata den man di RFTRC, pero e fondonan ku e evento bistoso riba laman a rekoudá en todo kaso ta pa e metanan di RFTRC.
Henter dia tabatin diferente aktividat, músika i un bon ambiente na e playa di Mambo Beach kaminda John Anthony a entretené e presentenan. Despues a kuminsá pone tur kos bèk na òrdu pa entregá Mambo Beach/BLVD bèk limpi i bunita.
Ban pa e di-18 edishon
Direktiva di fundashon RFTRC bou di presidente Robbin Martina, ku Orco Bank komo spònser prinsipal, e spònsernan Curaçao Port Services, Remax, Glacial, Compliance & Forensic Caribbean, EWT, Grant Thornton, EY Caribbean, Intertrust, Coca Cola, Mambo Beach BLVD, Empire, Radio Service, BDO, Mammoet Printing, Massive Productions, Ducaso, Number Ten, Dynaf, Van der Valk, Extra, Antilliaans Dagblad, Profound, Amigoe, Socialutions, Paradise FM, Zanzibar, LionsDive, Bonita, Mood Beach, Wet & Wild Beach Club, Cabana Beach, Tramm en Vistra, un kantidat grandi di patrosinador mas ku tambe ta masha apresiá – tur por wak bèk kontentu riba otro evento grandioso. Fundashon RFTRC ta gradesidu tambe na tur partisipante, voluntario, patrosinador, polis, VKC, Krus Kòrá, Wild Hogs i tur e otronan pa nan kontribushon i ta konta ku nan koperashon atrobe pa e di 18 edishon di otro aña!
Mas informe agradabel di Ride
Aki ta sigui algun dato agradabel mas di e di 17 edishon di Ride, Walk, Swim i Surf for the Roses, ya ku esei tambe tabatin atrobe.
Mane’, un di e kasi 6000 partisipantenan tabata señor Jursey Marshall, presidente di e fundashon Ride for the Roses Boneriano; apénas un siman promé nan a selebrá nan evewnto grandioso. El a konta ku e mes a partisipá mas ku un be na e edishon di Kòrsou i ku sosten di miembronan di direktiva di e fundashon di Kòrsou nan a lanta e vershon di Boneiru. Mientrastantu nan a organisá nan evento pa di seis biaha na Boneiru.
For di Israël no ta pa promé biaha ku señora Rita Mendes Floor-Chumaceiro (75) a partisipá na e Swim for the Roses – i landando sin ‘zwemfin’! Tres aña pasá pa promé be. Anke ku el a nase i lanta na Kòrsou, e tabata semper poko kouteloso pa tribon i otro kreatura di laman i por lo tantu no tabata hinka den su kabes pa bai landa den laman habrí kaminda tabatin áreanan skur. Su meta? Pa kita e miedu pa laman skur. Esei el a logra e tempu ei, i awor dinobo. Ke men ku partisipashon repititivo na Swim for the Roses el a logra vense su miedu definitivamente awor. E ta aden otro aña atrobe? Esei ta algu sigur no mester ekskluí.
For di Paris, Fransia, tin un grupo di studiante temporalmente na Kòrsou pa un proyekto spesífiko. Ora nan a tende di evento aki, nan a disidí pa bula aden, tambe pasobra e ta un bon kousa. E grupo aki di un forma amabel a kana mei-mei di e algun mil otro partisipantenan na e Walk for the Roses ku a pasa riba brùg haltu.
Na e Swim for the Roses tabatin partisipante tambe ku sierto hèndikèp. Por ehèmpel, un dama ku tin anda sin un pia (=voet) i den su bida kotidiario i e tin ku kokochá riba e otro pia. Tòg esei esaki no a strob’é pa drenta e aventura aki, mei-mei di un grupito di hende ku a landa huntu kuné. Banda di e kaso aki tin esun di e bushi lokal Chris Richards ku tambe ku un pia i bou di guia di algun hende ku a kompañ’é landando di Zanzibar pa Mambo Beach. Algu èkstra agradabel tabata ku komo sorpresa p’e den tur sekresia su ruman Jane a bula bini for di Hulanda pa personalmente entregu’é e rosa kòrá tradishonal na yegada
Na e Walk for the Roses a resaltá e grupo kresiente di ‘survivor’ di kanser, bistí na flanèl kòrá – indikando esnan ku a logra nan detektá nan problema di salú na tempu i ku por a trata nan di moda ku nan por ta riba pia atrobe pa por partisipá na aktividatnan ku ta na benefisio di esnan ku ta lucha ku e mesun situashon.
Ademas ta grasioso pa informá ku e siklista/partisipante Jeffrey van Aken atraves di social media di un forma spontáneo a start un akshon pa krea entrada adishonal pa Ride for the Roses. Den un tempu relativamente kòrtiku el a logra kolektá un suma di 700 florin; estando na Mambo BLVD el a transferí e montante aki na e fundashon
