WILLEMSTAD – Ya pa basta tempu e fundashon Ride for the Roses (RFTR) a start e makinaria pa laga e aktividatnan di Ride, Walk & Swim for the Roses tuma lugá atrobe na kuminsamentu di e aña nobo 2024. Durante e konferensia di prensa djamars, den presensia di gerensia di e patrosinadó prinsipal ORCO Bank, a elaborá riba loke RFTR a prepará pa e periodo benidero. Tradishonalmente ta atraves di esaki en koperashon di komunidat ta kolektá fondo pa mensualmente sostené Fondo Prinsess Wilhelmina (PWF) den nan lucha kontra kanser i pa guia e pashèntnan di kanser i nan famia.
Ride for the Roses 2024 Presidente di RFTR Robbin Martina a yama bon biní i a kontinuá anunsiando e programa di aktividat manera a plania pa kuminsamentu di 2024. Despues di algun aña difísil, entre otro pa un paro di e aktividatnan komo konsekuensia di e periodo di Covid, ta importante pa reagrupá i kontribuí atrobe ku aktividatnan deportivo na e reservanan di e fundashon RFTR. E aktividatnan pa e findishi Art for the Roses anteriormente e aña aki a kontribuí grandemente pa parsialmente mitigá e kaida di ingreso. Djadumingu dia 28 di yanüari 2024 tin programá atrobe e Ride (korementu di baiskel), Walk (kanamentu 7 kilometer pasaondo riba brùg Juliana i 5 kilometer krusando brùg di ponton) i Swim (landa den laman habrí) for the Roses den e mesun forma ku añanan anterior. Hustamente pa esei algun luna pasá a saka e senarionan di e edishon último pa perkurá pa e eventonan grandi aki kana bon – i pa nan ta eksitoso atrobe. Esnan ku ta kana manera ta kustumber ta kuminsá na Awasá i ta yega na e lugá di stashonamentu na BLVD. Pa motibu di e eksperiensianan di aña pasá a mehorá e partimentu di kos di bebe i fruta konsiderablemente, kaminda en koperashon ku partnernan lo tin atenshon tambe na un forma duradero pa deshasí di sushi. For di e sitio ei tambe e gruponan di siklista ta sali pa nan diferente rutanan. I e landadónan ta bula na awa na Zanzibar aj Jan Thiel pa subi tera atrobe na e playa largu di Seaquarium. Bou di guia di e inisiadónan Kim Matroos i Laura Goense e aña aki un biaha mas lo tin un grupo di ‘wind- i kite surfer’ ta yega Mambo Beach saliendo for di Klein Kòrsou. E aña benidero un biaha mas hopi akshon i espektákulo! Na e ‘site’ renobá di inskripshon lo ta posibel pa elektrónikamente registrá pa partisipá na e diferente elementonan. Den esaki a tene kuenta tambe ku e opshon pa un forma rápido di registrashon i a fasilitá pa paga ‘online’ tambe. Spesialmente pa registrá gruponan (manera di klup, kolega, amigu, etc) esaki por ta un gran yudansa.
PWF: solidaridat Komo presidente di Fondo Prinsesa Wilhelmina (PWF), señora Ageeth Termars a enfatisá kon importante e aktividatnan aki di RFTR ta pa e fondonan di PWF. Ya pa basta aña e koperashon aki ta eksistí ku ta hasi posibel pa PWF sigui hasi su trabou. E ta yuda pa hasi PWF konosí i e ta kontribuí
den komunidat pa konsientisá hende di kanser. Banda di esei, riba e dia di e aktividatnan mes, ta bunita pa mira e solidaridat pa tur aña di nobo e ta un éksito, hustamente pa e partisipantenan. Solidaridat den multiple sentido, pero spesialmente enkuanto kanser, e sosten i rekonosementu di pashènt di kanser, anto tambe kon e poblashon di Kòrsou ta reakshoná riba esei di un manera positivo. “Anto, huntu nos ta hasiendo e diferensia”, segun señora Termars.
Orco: kompromiso Orco Bank komo patrosinadá prinsipal, representá pa su Managing Director señora Désirée Alberto, a rekonfirmá e papel ei alargando e akuerdo mutuo un biaha mas. Segun e, e evento no ta simplemente un demostrashon di perseveransia físiko i sentido di sivismo, pero tambe un tèstamènt di nos kompromiso kolektivo pa hasi un diferensia den e lucha kontra kanser. Nos envolvimentu ku Ride, Walk i Swim for the Roses 2024 ta un refleho di nos dedikashon na komunidat i nos kompromiso pa respaldá inisiativanan riba tereno di salú.
Website Direktiva di RFTR i un ehérsito di kolaboradó voluntario ta ansisoso pa reanudá e aktividatnan. E miembronan ta direktiva ta Robbin Martina (presidente), Benno van Leeuwen (sekretario), Raoul Hooftman, Sayenne Dennert-Dick, Arthur Rosaria, Maria-Helena Seferina-Rojas, Jessica Russel-Lucasius, Frans Heiligers i ku respaldo di e stazjèr Rose Webb. Bou di guia di Profound i Socialutions Caribbean a profeshonalisá e website di RFTR di tal forma ku atraves di www.ridefortheroses.net por hasi dunashonnan on-line. Esei ta habri e posibilidat pa persona i instansianan pafó di Kòrsou tambe kontribuí na e bon kousa ku RFTR ta para p’e.
