WILLEMSTAD – Despues di e eksitoso di-16 edishon di e evento Ride, Walk i Swim for the Roses na 2020, direktiva, patrosinador i kolaboradornan voluntario no por a hasi nada otro sino wak kon esei a para na un manera abrupto pa motibu di e pandemia di covid. Pa 2023 si ta hasiendo e preparashonnan nesesario pa rekoudá fondo atrobe ku koperashon di komunidat pa por duna akohida i guia na pashèntnan di kanser aki na Kòrsou.
Algun luna pasá a saka e senarionan dinobo pa por tin tur kos kla na tempu pa e edishon nobo di e evento masal aki. Ta trata aki entre otro di Walk for the Roses pa koredó i kanadó, for di mainta tempran for di Awasá pa pasa sea riba brùg haltu òf riba ‘the swinging old lady’ pa bai Mambo Boulevard. En seguida for di aya otronan, hóben i mas grandi, ta subi baiskel pa diferente ruta stipulá ku ta finalisá atrobe kaminda nan a start. Mas lat e mainta bou di bon guia e landadónan di kompetensia i di rekreashon ta sali for di Zanzibar na playa di Jan Thiel pa e playa di Mambo Boulevard.
Komo fecha pa e evento di e aña nobo aki a stipulá djadumingu dia 5 di febrüari, e fin di siman entre Festival di Tumba i Karnaval di Mucha. Luna pasá a entregá e petishon pa pèrmit na outoridatnan. Pues, kada ken tin sinku siman ainda pa hasi a preparativonan i si mester pa hasi ehersisio pa por ta den kondishon óptimo di 5 di febrüari awor. Atraves di e website di fundashon Ride for the Roses Curaçao (www.ridefortheroses.net) ya ta posibel pa inskribí. Pronto lo sigui ku mas detaye.
