WILLEMSTAD – Riba e mes dia ku e Ride, Walk & Swim for the Roses ta tuma lugá, djadumingu 5 di febrüari, un grupo di persona ku hopi kurashi ta tuma e reto riba nan pa e promé edishon di Surf for the Roses: “Nos ta bai sùrf ku mas ku kuarenta kitesurfer, windsurfer i wingfoiler for di Klein Kòrsou pa Mambo Beach Boulevard”, asina inisiadó Emanuel Quintero a konta. E plaka ku e sùrfernan ta kolektá ku esaki ta bai pa e fundashon Ride for the Roses i ta benefisiá respaldo na pashèntnan di kanser i nan famia na Kòrsou.
Nunka promé un grupo asina grandi a sùrf di Klein Kòrsou pa Kòrsou. Pa loke ta organisashon, seguiridat i logístika e ta un operashon basta grandi. Quintero (doño di Klein Curaçao Kitesurfing) ku inisiadó Kimberley Matroos (doño di Awa Salu Kiteboarding) den nan tempu liber ta bastante okupá ku esaki. Por ehèmpel, a organisá pa e partisipantenan un seshon di entrenamentu i chekeo di material den awa di Chinchó. Matroos: “E windsurfer i wingfoiler-nan por drenta riba bientu na Mambo Boulevard. E kitesurfer-nan mester hasi un self rescue, ke men nan mester baha nan fli den awa hundu tras di e kibra-olanan i paketá esaki. Esei nos a trein.”
E sùrfernan ta sali 11:30 or for di Klein Kòrsou i e espektativa ta ku nan lo alkansá Mambo alrededor di 14:00 or, poko despues di Swim voor de Roses. Quintero: “Dependiendo di e forsa di bientu i kon haltu e olanan ta, e por dura algu mas tambe. Esaki ta e promé edishon, ku otro palabra nos lo mira kon rápido e ta bai ku un grupo asina grandi.” Tur partisipante tin ámplio eksperensia di sùrf i pa garantisá nan seguridat tin entre otro Citro i un kantidat di boto ku lo kompañá nan. Mas bou di kosta kaminda tin konstrukshon na Mambo, e chèns t’ei ku no tin sufisiente bientu; den tal kaso e boto lo saka e sùrfernan for di awa i hiba nan playa.
“Nos ta haña masha tòf ku e sùrfernan ta bai hasi esaki. E ta primintí di bira un espektákulo i nos ta apresiá ku e grupo di e deporte di sùrf asina tambe ta kontribuí na nos meta”, segun Robbin Martina, presidente di Ride for the Roses.
Irie Tours ta yuda e sùrfernan i ta transportá nan grátis pa Klein Kòrsou. Wet & Wild, Y-knot Fishing, Mermaid i Curaçao Boat Charters tambe ta sostené e inisiativa. Di nan mes un kantidat di grabadó di vidio i fotógrafo ta bai sigui imortalisá Surf for the Roses pa atraves di social media alkansá mas tantu hende posibel i pa halsa e konsiensia di kanser. E plaka di inskripshon pa e partisipantenan (145 florin pa persona) ta bai kompletamente pa e lucha kontra kanser i pa respaldá pashènt di kanser na Kòrsou.
