WILLEMSTAD – Fundashon Ride for the Roses Curaçao (RFTRC) por wak bèk atrobe riba un evento magno eksitoso esta e 18 edishon di Ride, Swim, Walk & Surf for the Roses riba djadumingu. Un biaha mas komunidat di Kòrsou a demostrá ku nan ta kombibí ku pashènt di kanser i ku nan kuido ta den bon man serka Prinses Wilhelmina Fonds (PWF). Un gran palabra di gratitut ta bai na e mas ku 6000 personanan ku e djadumingu ei a partisipá na e diferente aktividatnan i asina a kontribuí un granito na e rekoudashon di fondo. Ku respaldo di e patrosinadornan aserka tur e aktividatnan, a generá na total kasi 300.000 florin pa e bon kousa.
Señal di salida
7 Or di mainta, deskontando huntu ku e públiko di 10 pa 1, e gerentenan Désirée Alberto-Martina i Edward Pietersz di Orco Bank, presidente di PWF Ageeth Termars, i algun miembro di direktiva di RFTRC na Plasa Brion a duna e señal pa salida di Walk for the Roses, un ruta di 7.8 kilometer pasando riba e brùg haltu Juliana pa atraves di Waaigat, Pèn i Mari Pompun kaba na Mambo Beach/BLVD. Tabatin un ruta alternativo di 5 km pa kana for di Awasá riba brùg Emma pa Mambo Beach/BLVD. Manera kustumber Maarten Schakel a animá tur esnan na final. Na yegada e partisipantenan a risibí un bunita rosa, i un refresko i un fruta; esei tabata warda e partisipantenan na e otro partinan deportivo tambe.
E tres elementonan di korementu di baiskel Ride for the Roses tambe a kana bon. Miéntras ku e kanadónan tabata drentando, e gruponan di koredó di baiskel a sali; promé pa e ruta di 60 i despues di 40 km, djis despues siguí pa e kareda Easy Ride di 10 km, pa Punda i bèk. Salida i final di tur e rutanan tabata na Mambo Beach/BLVD. E mainta ei na Madera tabatin tambe seshonnan di Xtra fit bou di guia di Blue Maxx Health Club pa haña òf tene e kurpa den bon kondishon; riba esaki tambe a reakshoná ku entusiasmo.
Landamentu
Algu despues di 12 or di mèrdia e landadónan a sali for di Zanzibar/Jan Thiel. Aki e kordinador di landamentu Andrew Solomon i e presidente di RFRTC Robbin Martina den presensia di un representante di spònser grandi di Swim for the Roses, CPS, a duna e señal di salida. Promé esnan di kompetensia, siguí korto tempu despues pa esnan rekreativo. Nan tur a sali for di awa na Wet & Wild. Despues direktor Edward Pieters di spònser prinsipal Orco Bank a entregá e premionan na e ganadónan di e kompetensia: serka e damanan 1. Zinha Falbru, 2. Gabriela Johannes Maduro i 3. Ri-Johnna Pedro. Serka e hòmbernan: 1. Karim Alders, 2. Nageaud Albert Ricardo i 3. Aron Angela. E tres hòmbernan a traha duru pa por a keda tene e promé dama nan tras. Na e yegada aya John Anthony i Dj Boogieman a perkurá pa un animashon alegre.
Ora e último landadónan a drenta djis despues di mitar di tres, ya e promé sùrfdónan (kitesurfers, windsurfers i wingfoilers) e bini Mambo Beach for di Klein Kòrsou. A presentá nan tambe un ratu. Tabata e di dos aña konsekutivo ku nan a forma parti di e evento aki.
Ban pa esun di 2025
Aparte di tur e partisipantenan direktiva di RFTRC ta masha agradesidu na e mas ku 200 voluntario, kolaboradornan, polis (KPC), Krus Kòrá, Wild Hogs, VKC, Ministerio di Defensa, Citro, Wardakosta, e botonan ku a sigui i hopi mas, entre nan e organisadónan Kim Matroos i Laura Goense i e partisipantenan na Surf for the Roses, pa nan kontribushon i ta konta na 2025 atrobe riba nan kolabotrashon. Pa loke ta e spònsernan e gratitut ta bai pa Orco Bank komo spònser prinsipal, i tambe na Curaçao Port Services, Remax, Glacial, Compliance & Forensic Caribbean, EWT, EY Caribbean, Coca-Cola, Mambo Beach BLVD, Franky’s, Empire, BDO, Mammoet Printing, Massive Productions, Ducaso, Aqualectra, Baker Tilly, Avila Beach Hotel, Dynaf, Van der Valk, Extra, Antilliaans Dagblad, Profound, Amigoe, Socialutions, Lions Dive, Bonita, Mood Beach, Wet & Wild Beach Club, Cabana Beach, Tramm, Vistra, Madero, Radulphus College, Securitas, Zanzibar, Wet & Wild, Sorsaka Bikers, Mood Beach, More than my mortgage, Road Runners Club Curaçao, Secured, Ox & Wolf, Selikor, Serena’s Art Factory, Videmi Services, Green Phenix, AMC / Bolt Express, Madero, Kukudushi, TV Direct, TeleCuraçao, Radio Dolfijn, Radio Paradise FM, Radio Krioyo, Radio Hoyer, Radio MAS, Centrum Supermarkt, Carrefour, Caribbean Cargo, Brigada di Seguridat, Curaçaosche Wegenbouw Maatschappij, Ensure, Irie Tours, HBN Law & Tax, Kortijn, Mambo Beach/BLVD, Green Phenix, Lawrence Mensa Foundation, IBIS Management, Kooyman, Zanzibar, Perfect Flowers, John Anthony i Willy Harms/Dj Boogieman.
